छत्तीसगढ़ में नंदावत हे

छत्तीसगढ़ में नंदावत हे
रचना:- पं. खेमेस्वर पुरी गोस्वामी (छत्तीसगढ़िया राजा)
कभू-कभू मोर मन मं,
           ये खियाल आवत हे।
इडली-दोसा ह संगी,
          सबो झन ल मिठावत हे।
चिला-फरा ह काबर,
           कोनो ल नइ भावत हे।
छत्तीसगढ़ी बियंजन ह,
           छत्तीसगढ़ मं नदावत हे।

दूसर के रंग मं संगी,
            खुद ल रंगावत हे।
बासी-चटनी बोजइया,
            पुलाव ल पकावत हे।
पताल के झोझो नदागे,
           मटर-पनीर सुहावत हे।
छत्तीसगढ़ी बियंजन ह,
           छत्तीसगढ़ मं नदावत हे।

अंगाकर के पूछइया,
               पिज्जा म हट जावत हे।
बोबरा-चौसेला ल छोर के,
         सांभर-बड़ा सोरियावत हे।
भुलागे खीर बनाय बर,
        लइका ल मैगी खवावत हे।
छत्तीसगढ़ी बियंजन ह,
          छत्तीसगढ़ मं नदावत हे।

तिहार मं नइये संगी,
            ठेठरी-खुरमी के खवइया।
आजकल के बहू भइया,
          नवा-नवा रोटी बनइया।
अइरसा-पोपची भुला के,
      नमकीन-गुजिया बनावत हे।
छत्तीसगढ़ी बियंजन ह,
         छत्तीसगढ़ मं नदावत हे।

अपन भाषा,अपन बोली,
          बचावव नारा लगावत हे।
जेने ह नरियावत हे,
                 तेने ह मिटावत हे।
छोर के हमर भाषा,
           अंग्रेजी मं गोठियावत हे।
छत्तीसगढ़ी भाषा ह,
          छत्तीसगढ़ मं नदावत हे।
अपन ल छोड़ के ,
सबे ल अपनावत हे।
अरे भई,
  जेने नइ तेने जगा तो  ठगावत हे।
रोटी भाखा के का कबे,
छत्तीसगढ म खुद छत्तीसगढ़िया नदावत हे ।
अब तो बाहरी मन,
छत्तीसगढ़िया बन जावत हे ।
बाहरीच मन बर  तो,
सब ले बढि़या  कहावत हे?
छत्तीसगढ़ मं खुद छत्तीसगढ़िया नंदावत हे!!
छत्तीसगढ़िया नंदावत हे......!!
जय जोहार, जय छत्तीसगढ़।